"A tous ceulx qui ces lettres veront ou orront, Jean Baudouin, escuier, garde des sceaux aulx obligations de la viconté de Fallaize, sallut. Scavoir faisons que par devant Robert Allain et Pierre Hüe, tabellions pour le Roy notre sire commis en ladite viconté du siège de Pont D’Ouilly, furent présents révérend père en Dieu monsieur Jullien, par la permission
divine abbé de l’abbaye et couvent Nostre Dame du Val, religieux honnestes hommes maistre Guillaume Turgot, pitancier de ladite abbaye, maistre Jehan Doisnel, prieur de la Forêt Auvray, maistre Robert Le Sauvage, maistre Olivier Le Breton, maistre Martin Trenchant et maistre René Le Nepveu, tous les religieux profez en ladite abbaye, establissantz et faisants fortz pour les aultres religieux dudit monastère, baillèrent en fieu affin d’héritage tant pour eux que pour leurs successeurs, à Jehan Coeurdoux et Marin Fauchon, tous de la paroisse de la Chapelle Engerboult, et a leur hoirs, c’est asscavoir une piece de terre assise en la paroisse de Sainct Pierre du Bo, comme elle se contient, jouxte la rivière d’Orne d’une part, en laquelle y a en mazure comme par cy devant en icelle y avoit maison et moulin foulleur a draps avecques escluses a faire venir l’eau audit moulin et une pescherie [?] de ladite pescherie lesdits sieurs ont faict de present retenue au moyen que lesdits seigneurs seront, eux et leurs successeurs, subjectz d’entretenir ladite escluse et pescherie a leurs depens, ladite piece de terre et mazure tout et ainsy comme elle se contient et comme ausdits sieurs en apartient et comme par cy devant a esté jouy et possedé par ung nommé Phillipin Basset qui avoit par semblable prinz en fief ladite piece de terre et place et par ses hoirs rendue et remise en mains desdits sieurs ainsy qu’il est porté par les lettres [?] de ladite rendue, y recours, et fut ledit bail et fief ainsy faict par lesdits sieurs ausdits Coeurdoux et Fauchon par le prix de soixante soulz tournois et une rame de pappier du plus grand et plus grand marge que lesdits preneurs et leurs hoirs en feront aux moullins qu’ilz prennent, et leurs hoirs en seront subjectz faire et paier annuellement et executoirement de rente par chacun an au jour et terme Sainct Michel en septembre ausdits sieurs et a leurs successeurs, premier terme de paier ladite rente du jour Sainct Michel prochain venant en ung an et ainsy d’an en an et de terme en terme lesdits termes escheuz, et ainsy le confesseur [?] baille lesdits sieurs au moien et par ce que lesdits preneurs, ensemble et avecques, se sont submis et obligez faire faire, parfaire, construire et rediffier ladite maison et en icelle ediffier ung moullin a pappier pour leur servir et valoir qu’il apartient par commun leur propre et vray heritage, et a ce moien lesdits sieurs leur ont promis aider de bois a faire edification de ladite maison avecques l’arbre et battant dudit moullin a pappier et aultres boys au plaisir et volonté desdits sieurs, aussy retenue faicte par lesdits sieurs de leur liberté a aller et venir en ladite maison, chauffer, coucher et lever en icelle quand il leur plaira venir pour pescher ladite pescherie ou aultrement, toutesfois et quantes qu’il leur plaira, eux, leurs successeurs et serviteurs, dont lesdits sieurs preneurs [?] se tiennent a comptent devant lesdits tabellions, promettantz lesdits sieurs ledit bail et fief par eux ainsy faire aller au contraire en aucune maniere, et icelluy bail garantir ausdits preneurs et a leurs hers, et en faisant et payant par chacun an ausdits sieurs et a leurs successeurs lesdits soixante solz tournois et la dite rame de pappier de rente ainsy que dit est et devisé [?] et a ce lesdits seigneurs en obligent tous les biens meubles et heritages dudit monastere, tant present que advenir, tous pour prendre, vendre, [?] et despendre d’office de justice ainsy que en ledit cas apartient. En tesmoin de ce, ces lettres sont scellees des sceaux dessusdits. Ce fut faite et passé saouf aultruy droit le quatorze jour de fevrier, l’an mil cinq cent trente huit, presentz maistre Richard Gauvain, pretre curé de Causseville [?] et maistre Philippe Boysire, pretre, tesmoins, signé Allain et Hüe, chacun ung paraffe. Collation faicte a l’original escript sur parchemin, dont la copie est cy devant escripte par nous René Trenchant et Pierre Hüe, tabellions au baillage de Thury pour le siege dudit lieu et environs, a la requete de Marin et Marin, ditz Faucon, pappettiers de ladite paroisse du Bo, lesquels nous ont requis la presente pour leur servir qu’il apartient et appert ladite collation sur l’original de la presente coppie a eux rendue le cinquième de mars [?] l’an mil six cent vingt deux presence de Jehan Fauchon, de Sainct Marc d’Ouilly, et Guillaume Roquet [?], de la dite paroisse du Bo tesmoins."
19 août 1573 : bail à Guillaume Fauchon, papetier, de la pêcherie du moulin dit de la Roche."
![La Normandie, 4. Le Bo (Calvados). - Le Moulin à papier.- Carte postale, éd. Levasseur, Flers, s.d., [début 20e siècle]. (Collection particulière Claude Gérard, Clécy).](/img/91191f9a-6c4f-418a-994e-76d729277740)
